8 HƏFTƏLİK HAMİLƏLİK: KÖRPƏNİN İNKİŞAFI, SİMPTOMLARI VƏ İLK HƏKİM MÜAYİNƏNİZ
Budur, böyümə sürəti gəlir: balacanız bu həftə ikiqat böyüyəcək.
Bu həftə körpənizin inkişafı
6-cı həftədən 10-cu həftəyə qədər inkişaf edən körpənizin ölçüsü dörd dəfə artacaq və görünüşündə əsaslı dəyişikliklərə məruz qalacaq.
Körpəniz artıq embrion deyil, döl adlanır və daha çox kiçik bir insan kimi görünməyə başlayır.
8-ci həftədə çiyinləri və dirsəkləri inkişaf edəcək və bu da yuxarı ətrafların irəliyə doğru çıxmasını təmin edəcəkdir. Ancaq budlar, dizlər, baldırlar, topuqlar və ayaq barmaqların inkişaf etməsi bir az daha vaxt alacaq.
8-ci həftədə hamiləliyin əlamətləri
Erkən hamiləlik əlamətləri
Yorğunluq, tez-tez ağlamaq ehtiyacı və əhval dəyişikliyi kimi erkən hamiləlik əlamətləri haqqında “Hamiləliyin ilk göstəriciləri və əlamətləri” məqaləsində daha ətraflı oxuyun.
Hamiləlik itkisindən sonra narahatlıq
Hamiləlikdə həyəcan və narahatlıq çox rast gəlinir. Əgər daha əvvəl körpənizi itirmisinizsə, bu, narahatlığı daha da artıra bilər.
Keçirdiyiniz hisslərə görə özünüzü günahlandırmayın. Bu duyğuları yaşamağınız tamamilə başa düşüləndir. Nə hiss etdiyinizi həkiminizə deyin. Lazım gələrsə, onlar sizə dəstək verə və müalicə təklif edə bilərlər. Əgər daha ciddi köməyə ehtiyacınız varsa, hamilə qadınlar üçün psixi sağlamlıq mütəxəssisinə müraciət edə bilərsiniz.
Daha təhlükəsiz hamiləlik
Heç kim mükəmməl hamiləliyə zəmanət verə bilməz. Ancaq hamiləlik itkisi və ağırlaşma riskini azaltmaq üçün edə biləcəyiniz bəzi şeylər var. Daha ətraflı “Daha təhlükəsiz bir hamiləlik üçün ediləcək və edilməyəcək şeylər” məqaləsində oxuyun.
8-ci həftədə nə etməli
Söyləmək ya susmaq?
İnsanlara hamilə olduğunuzu deməyi qərar vermək şəxsi işinizdir. Bir çox insanlar hamiləliklərini 12 həftə keçməyincə ictimailəşdirməməyə qərar verirlər. Bunun səbəbi, 3 aydan sonra düşük riskinin kəskin şəkildə azalmasıdır.
Erkən hamiləlik müddətində ailəniz və yaxın dostlarınızın dəstəyinə ehtiyacınız ola bilər, buna görə də ilk 3 ayın sonuna qədər yalnız bir neçə nəfərə məlumat verməyi düşünə bilərsiniz.
İşdə risk altındasınız?
Əgər işinizin sağlamlığınız üçün risk ola biləcəyindən narahatsınızsa, menecerinizə hamilə olduğunuzu bildirin. İşinizdə olan bu risklər aradan qaldırılmalı və ya sizə fərqli iş təklif edilməlidir.
Hamiləlik üçün risk təşkil edən iş şəraitlərindən bəziləri aşağıdakılardır:
- Ağır yüklərin qaldırılması və ya daşınması;
- Kifayət qədər uzun müddət, fasiləsiz ayaq üstə durmaq və ya oturmaq;
- Zəhərli maddələrə məruz qalmaq;
- Uzun iş saatları.
İlk həkim müayinəniz
Növbəti bir neçə həftə ərzində sizin ilk müayinəniz olacaq. Bu, ginekoloq ilə ilk antenatal görüşünüzdür. Sizdən fiziki və emosional sağlamlığınız, ailənizin sağlamlığı, hər hansı tibbi probleminiz və həyat tərziniz haqqında çoxlu məlumat tələb olunacaq.
Sizə həmçinin yüksək qan təzyiqi, hamiləlik diabeti və sidik yollarının infeksiyaları kimi potensial problemlərə kömək edə biləcək müntəzəm qan və sidik analizləri təklif olunacaq. Bu ilk vizit bir saat çəkə bilər, ona görə də çox vaxt ayırın.
Cavablarınız antenatal qrupun sizin üçün düzgün dəstəyi təklif etməsinə kömək edə bilər. Axı, onların işi hamiləliyiniz zamanı mümkün olan ən yaxşı qayğıya sahib olmağınızı təmin etməkdir.
Həkimlə görüşünüz həm də hamiləliyiniz və doğumunuzla bağlı suallarınızı vermək üçün əla şansdır. Məsələn, siz keçirmək istədiyiniz skrininq və diaqnostik testlər haqqında bilmək və ya harada doğum etmək istədiyinizi müzakirə etmək istəyə bilərsiniz.
Düşük ehtimalı nə qədərdir və mən bunun qarşısını ala bilərəmmi?
Təəssüf ki, spontan abortlar tez-tez baş verir. Hər 5 qadından 1-i hamiləliyin ilk 3 ayında (erkən abort) heç bir səbəb olmadan düşür. Ancaq əksər düşüklər bir dəfə baş verir və növbəti hamiləliklər uğurlu olur. Əgər 1 və ya 2 dəfə erkən abort keçirmisinizsə, növbəti dəfə düşük riski yüksək deyil.
Biz hələ də düşüklərin hansı səbəbdən baş verdiyini həmişə bilmirik, bu da onların qarşısını almağı çətinləşdirir. Düşüklərin çox nadir hallarda etdiyiniz və ya etmədiyiniz bir şeyə görə baş verdiyini bilmək vacibdir. Erkən düşüklərin ən çox görülən səbəbi (ən çox rast gəlinən düşük növü) körpədə xromosom anomaliyalarıdır və bunlar təsadüfən baş verir.
Sağlam bir hamiləlik üçün əllərindən gələni edən bir çox qadın, təəssüf ki, körpəsini itirir. Ancaq hamiləlik dövründə çox içmək və ya siqaret çəkmək kimi düşük riskini artıran bəzi həyat tərzi seçimləri də var.
