7 HƏFTƏLİK HAMİLƏLİK: KÖRPƏNİN İNKİŞAFI, İDMAN VƏ 40 YAŞDAN YUXARI QADINLARDA HAMİLƏLİK
Bir vaxtlar lobya boyda olan körpəniz indi üzüm giləsi boydadır.
Bu həftə körpənizin inkişafı
Körpəniz başı bədəninin qalan hissəsindən daha sürətli böyüyür. Bu, onların sürətlə inkişaf edən beyinlərinə yer açmaq üçündür.
Onların kiçik qollarında və ayaqlarında qığırdaq əmələ gəlməyə başlayır. Qollar uzanır və ucları düzləşir. Bu kiçik əllərin başlanğıcıdır.
Körpənizin bədənində zərif bir sinir şəbəkəsi yayılır. Beyin və onurğa beyni bədənlərindəki əzələlərə siqnal göndərdiyi üçün daimi kiçik hərəkətlər etməyə başlayırlar. Tezliklə körpəniz temperatur və dad kimi duyğuları hiss edə biləcək.
7-ci həftədə hamiləliyin əlamətləri
Yorğunluq hissi
Erkən hamiləlik müddətində yorğunluq və ya hətta tükənmişlik hissi tez-tez olur. Bütün bunlar hormonların hesabınadır. Xüsusilə işləyirsinizsə və ya başqa kiçik uşaqlarınız varsa, bu çətin ola bilər, lakin mümkün qədər istirahət etməyə çalışın.
Susuzluq hiss edirsiniz?
Vücudunuzdakı qanın həcmi artır və bu, adi haldan daha çox susuzluq hissi yarada bilər. Su qəbizliyi azaltmağa kömək edir və körpənin ətrafında amniotik mayenin formalaşmasında rol oynayır.
Hər gün 8 orta stəkan maye içməyi hədəfləyin (ürəkbulanmanız varsa, qurtumla içmək daha yaxşıdır).
Həmişəkindən daha çox sidiyə gedirsiniz?
Daha tez-tez sidiyə getmək istəyinin yarandığını fərq edə bilərsiniz. Bu, adətən hormonlar sayəsində erkən hamiləlik müddətində başlayır və böyüyən uşaqlıq sidik kisəsini sıxdıqca davam edir.
Bəzi insanlarda erkən hamiləlik müddətində qəbizlik və ya daha çox vaginal axıntı olur.
Dişlərinizi fırçalayanda diş ətləriniz qanayır?
Hamiləlik dövründə dişlərinizə əlavə qayğı göstərməlisiniz. Çünki, hormonlarınız diş ətinin şişməsi, ağrıması və qanamasına səbəb ola bilər. Diş həkiminiz bu işdə sizə kömək edəcək. Daha ətraflı “Hamiləlikdə ən çox rast gəlinən 10 sağlamlıq problemi” məqaləsində oxuya bilərsiniz.
7-ci həftədə nə etməli
Aktiv olun
Əgər fəsadsız bir hamiləlik keçirirsinizsə, hamiləlikdə aktiv olmaq təhlükəsiz və sağlamdır. Bu, hamiləliyiniz irəlilədikcə bədəninizin uyğunlaşmasına və doğuşun öhdəsindən gəlməyinizə kömək edə bilər. Məşq körpənizə zərər verməyəcək.
Hamiləlik dövründə edə biləcəyiniz məşq miqdarı hamilə qalmadan əvvəl nə qədər aktiv olduğunuzdan asılıdır.
Əgər əvvəllər çox məşq etməmisinizsə, aktiv olmaq üçün edə biləcəyiniz bir çox sadə idman hərəkətləri var. Fayda əldə etmək üçün məşqlər gərgin olmamalıdır.
Hamiləlikdə edə biləcəyiniz müxtəlif növ məşqlər var və bunların içərisində çanaq dibi məşqləri daha vacibdir.
40 yaşdan yuxarısınızsa
40 yaşdan yuxarı qadınların əksəriyyəti sağlam hamiləlik keçirib, sağlam körpələr dünyaya gətirirlər, lakin statistik olaraq, ağırlaşma riski də çoxdur. Yaşınızdan asılı olmayaraq ümumi sağlamlığınız normal hamiləlik üçün çox vacibdir.
Bütün antenatal vizitlərinizə vaxtında getməyiniz tövsiyə olunur. Əgər yaşınız çoxdursa, sizin və körpənizin sağlam olub olmadığını yoxlamaq üçün sizə daha çox testlər təklif olunacaq.
